МУБИС-ийн НХУС – ийн “Багшлахуйн ур чадвар” олимпиад

МУБИС-ийн бүрэлдэхүүн сургуулиуд болоод багш бэлтгэдэг их дээд сургуулийн оюутнуудын дунд жил бүр уламжлал болгон зохион байгуулдаг “Багшлахуйн ур чадвар” олимпиадын нэгдүгээр шатны шалгаруулалтыг 2024 оны 03 сарын 25-ны өдөр НХУС амжилттай зохион байгууллаа.

Тус олимпиадад Нийгмийн ухааны багш, Англи хэлний багш, МХУЗ-ын багш, Түүх, нийгмийн ухааны багш, Герман хэлний багш, Орос-Англи хэлний багш, Япон хэлний багш мэргэжлийн 7 баг оролцож ээлжит хичээлийн төлөвлөлт боловсруулан хичээл заах, дадлагын үед тулгарсан бэрхшээл, шийдвэрлэх арга зам сэдвээр постер бэлтгэх үзүүлэлтүүдээр уралдав. НХУС-ийн “Багшлах ур чадварын уралдаан” зохион байгуулах комиссын бүрэлдэхүүнд бүх тэнхимийн заах аргын багш нар ажиллалаа. Багууд дараах сэдвээр хөтөлбөрөө боловсруулан хичээл заав. МХУЗ–ын багшийн анги 11 дүгээр ангийн уран зохиол Альфонс Доде “Сүүлчийн хичээл” сэдвээр, Герман хэлний багшийн анги “Чөлөөт цаг (Meine Freizeit)” сэдвээр, Орос–Англи хэлний багшийн анги 9 дүгээр ангийн “Что нам даёт лес?” сэдвээр, Япон хэлний багшийн анги “Баяр хүргэе!” ярианы хичээл, Англи хэлний багшийн анги “Who does what?” сэдвээр, Нийгмийн ухааны багшийн анги 9 дүгээр ангийн “Шийдвэр гаргах үйл ажиллагаанд иргэд оролцох ямар боломж байна вэ?” сэдвээр, Түүхийн багшийн анги 6 дугаар ангийн “Эртний Египет” сэдвээр тус тус хичээлээ бэлтгэж, амжилттай зохион байгуулав. Нийлбэр оноогоор Орос-Англи хэлний багшийн ангийн оюутнууд ТЭРГҮҮН БАЙР эзлэн, дараагийн шатанд салбар сургуулиа төлөөлөн оролцохоор боллоо. Олимпиадад идэвхтэй, амжилттай оролцсон оюутан багш нартаа талархал илэрхийлж, амжилт хүсье!